Mañá, martes 26 de novembro, presentarase o último número da revista Mazarelos, o 14, na capital galega. Será na Fundación Granell ás 18h. O evento incluirá unha presentación do número e unha conversa sobre o artista inglés Philip West na que participarán Eduardo López Valiña, conservador xefe da Fundación Eugenio Granell e comisario da exposición Philip West. El cuerpo de la máquina; Dolores Villaverde Solar, historiadora da arte, profesora da UDC e autora do artigo Philip West e a súa forma de comprender o mundo, publicado neste último número; e Brais Ferreiro Ares, historiador e editor de Mazarelos: revista de historia e cultura.
O artista surrealista Philip West cedeu en depósito boa parte da súa obra, e doou a súa biblioteca persoal á Fundación Granell. Isto, xunto co feito de que Dolores Villaverde é investigadora habitual na Fundación, fai desta presentación unha ocasión única de achegarse tanto á figura de West como ao proxecto da revista Mazarelos en xeral.
Podes subscribirte ou facerte coa túa revista 14 na nosa tenda en liña.
